December 4, 2025-Hindi lamang ilaw at palamuti ang nagbigay-ningning sa ginanap na Palawan State University (PalawanSU) Night, bagkus ay ang serye ng makabuluhang pagtatanghal at pagkilala na nagpatingkad sa diwa ng komunidad at tagumpay.
Ang gabi ay pormal na binuksan sa paghahatid ng “2025: A Year of Trials, Triumphs, and Milestones,” isang presentasyon na nagpapakita ng mga hamon, pag-unlad, at mahalagang tagumpay na nakamit ng unibersidad sa loob ng taon. Sinundan ito ng mga Welcome Messages mula sa mga Vice Presidents ng unibersidad na sina: Dr. Maila N. Lucero, VP for Academic Affairs, Dr. Rodolfo O. Abalus, Jr., VP for External Campuses, Dr. Marjorie A. Española, VP for Research, Development & Extension, at Dr. Venzon L. Limpiada, VP for Finance & Administration, na nagbigay-diin sa kahalagahan ng pagkakaisa ng komunidad. Lalo namang nagbigay ng buhay at pag-asa ang mensahe mula kay Hon. Myrna Q. Mallari, CHED Commissioner at Chairperson ng PalawanSU Board of Regents (BOR), na nagbahagi ng salita ng pag-asa at patuloy na pagsuporta sa misyon ng unibersidad. Nagbigay rin ng kaniyang buong-pusong Christmas Message si Dr. Ramon M. Docto, PalawanSU President, na humimok sa lahat na yakapin ang diwa ng pag-ibig at pagkakaisa ngayong Pasko, at ipagpatuloy ang pagiging “tanglaw ng lahat.”
Ang isa sa pinakamataas na bahagi ng programa ay ang paggawad ng recognition at awards sa mga top performing colleges tulad ng College of Teacher Education (CTE), College of Arts and Humanities (CAH), College of Nursing and Health Sciences (CNHS), at School of Law (SOL), bilang pagkilala sa kanilang natatanging kontribusyon. Higit sa lahat, pinarangalan din ang dalawang Topnotchers na sina: Zachary Cayapas Orais, Top 7 sa PNLE (Philippine Nurse Licensure Examination); at Princesa Dumale Talamayan, Top 1 sa Midwife Licensure Examination, na nagdala ng karangalan sa buong PalawanSU.
Ang pinakatampok na bahagi ng gabi ay ang paglulunsad ng orihinal na awiting pamasko, ang “Liwanag ng Pasko,” na nilikha ni G. Demy R. Dizon at buong-pusong inawit ng batikang PalawanSU Singers. Ang awitin ay naging sentro ng gabi, naghahatid ng isang mensahe na mas malalim kaysa sa simpleng awit-pamasko. Ang “Liwanag ng Pasko” ay nagpapahayag ng isang matibay na mensahe ng katatagan at pagbangon ng komunidad ng PalawanSU. Ginamit ang bawat pagsubok (“Bawat sugat ay aral”) bilang inspirasyon upang muling bumangon sa pamamagitan ng pagmamahalan at pagkakaisa, hindi kailanman nagpapa-alipin sa “unos at dilim.” Sa Chorus, ipinapahayag na ang Pag-ibig ni Kristo ang pinagmumulan ng tunay na Liwanag at Pag-asa, at itinatampok ang PalawanSU bilang “tanglaw ng lahat,” isang bukal ng inspirasyon at kaalaman. Higit pa rito, binibigyang-diin ng awit ang Diwa ng Komunidad sa pamamagitan ng pagtutulungan, samahan, at pagkakaibigan, habang ang pagtatanghal nito ay nagpalawak ng Tagumpay at Pandaigdigang Mensahe ng unibersidad (“Palawan State University ay magtatagumpay!”), na naghahatid ng pagsuyo at Maligayang Pasko mula Palawan patungo sa buong mundo.
Sa kabuuan, ang “Liwanag ng Pasko” ay hindi lamang isang pagpapakita ng talento kundi isang pusong handog na nagpapaalala sa lahat na ang liwanag ng pag-ibig, pagkakaisa, at Pasko ay mananatiling gabay tungo sa mas maliwanag na bukas. Ang PalawanSU Night ay tunay na naging isang pagdiriwang ng tagumpay at ng walang-hanggang pag-asa.
